ISFJ ენეაგრამაში: ზრუნვა, რომელსაც არავინ ითხოვდა

ISFJ-ის ტელეფონის შენიშვნებში წერია, რომელ მეზობელს ჰყავს აბიტურიენტი, ვისი მამა იტანჯება წნევით და რომელ კოლეგას არ შეიძლება თხილი. კომუნალურებს ვადამდე ერთი კვირით ადრე იხდის, ახალ საბანკო აპლიკაციას კი მაშინ ჩამოტვირთავს, როცა ის დედის ტელეფონზეც გამოცადა. თხოვნაზე „კი“-ს ამბობს მაშინაც, როცა დღე უკვე გადავსებულია: ნათლულის სკოლის ღონისძიება, მეზობლის ბავშვის მოვლა, ბიძაშვილის საბუთები. დიდ შეკრებაზე ჩუმად ზის და ხმამაღალ ქებას გაურბის, მაგრამ იცის, ვინ მოვიდა იქ ცუდ ხასიათზე და ვის რა ჭირდება ხვალ.

ISTJ-იც ისეთივე საიმედოა, დროზე მოდის და მოულოდნელობა არ უყვარს, და ერთ კაბინეტში მათ ადვილად აურევთ ერთმანეთში. ყოფს T და F, ანუ ვის ემსახურება მოვალეობა. საავადმყოფოში ISTJ ექთანი ნახვის საათის ბოლოს პალატას წესისამებრ ცლის; ISFJ პაციენტის ქალიშვილს კიდევ ათ წუთს უტოვებს და სკამს უდგამს. ამხანაგობის ბიუჯეტზე ISTJ ყველასთვის ერთნაირ შენატანს იცავს, ISFJ კი სთავაზობს, რომ პირველ სართულზე მცხოვრებმა პენსიონერმა ნაკლები გადაიხადოს.

ტელეფონის შენიშვნებში ყველა სხვაა; რას იცავს ამ ზრუნვით თავად, იქ არსად წერია.

ISFJ-ში სამივე მოტივი ერთნაირად ზრუნავს: წინასწარ, ჩუმად და ძალაზე მეტად. ზრუნვის ყურებით მათ ვერ გაარჩევთ; უნდა ნახოთ, რის გარეშე ვერ ძლებს ადამიანი.

ძმის პატარა მაღაზიის ბუღალტერიას წლებია თქვენ უძღვებით, უსასყიდლოდ. ორი ამბიდან რომელი დაგამძიმებთ: საგადასახადოს შემოწმებამ თქვენს ჩანაწერებში შეცდომა იპოვა, თუ ძმამ გითხრათ, პროგრამა ვიყიდეთ და აღარ შეწუხდეო? შეცდომა ერთიანს ეხება, რომლის სისწორეც შეირყა; ზედმეტობა ორიანს, რომელმაც თავისი ადგილი დაკარგა.

დეიდა, რომელსაც რვა წელი უვლიდით და რომელთანაც ყოველ რჩევაზე დადიოდით, იტალიაში შვილთან გადავიდა, და ზარები თანდათან შეწყდა. რა არის მთავარი დანაკარგი: რომ აღარავის სჭირდებით ისე, როგორც მას, თუ რომ აღარ გყავთ, ვისაც დაეყრდნობოდით? პირველი ორიანისკენ მიდის, მეორე ექვსიანისკენ.

პოლიკლინიკაში, სადაც მუშაობთ, ქაღალდის ჟურნალები გააუქმეს და ყველაფერი ახალ ელექტრონულ სისტემაზე გადავიდა. რა არ გასვენებთ: რომ ახალი წესი ძველზე ცუდი და არასწორია, თუ რომ აღარ იცით, რას დაეყრდნოთ? არასწორობა ერთიანს აწუხებს, გაურკვევლობა ექვსიანს.

ყველაზე ადვილად იტალიის კითხვას ეძებნება პასუხი, და სწორედ ეს სიადვილე უნდა გაფრთხილებდეთ. ISFJ მას დეიდაზე პასუხობს: „მთავარია, იქ კარგად იყოს“. ასე F და S ლაპარაკობს, ჩვევა, რომ ჯერ სხვის მდგომარეობას შეხედოთ და დახმარების გზა ეძებოთ; კითხვა კი თქვენს დანაკარგზე იყო. თუ პასუხი ერთ წამში მოვიდა და მასში „მე“ არსად ჩანს, ესე იგი, დეიდაზე უპასუხეთ და არა საკუთარ დანაკარგზე.